ভূৱা আই. বি. অফিচাৰ

ভূৱা আই. বি. অফিচাৰ

             উজ্জ্বল দীপলু গগৈ

(যোৰহাটত ধৰা পৰা ভুৱা মেজিষ্ট্ৰেটৰ দৰে একেই কাহিনী এটা)

সেইসময়ত আমি মাষ্টাৰ্চ ডিগ্ৰীৰ লাষ্ট চেমিষ্টাৰৰ ছাত্ৰ৷ এদিনাখনৰ কথা, ক্লাচ একমান বজাত শেষ হোৱাত হোষ্টেললৈ আহি ফিল্ডতে বহি লৈ হোষ্টেলৰ সন্মুখেৰে পাৰ হৈ যোৱা ছোৱালীবোৰক 'মাইনা বিয়া পাতিম

সোণৰ খাৰু বনাই দিম তোমাৰ-মোৰ সুখৰ সংসাৰ'

ইত্যাদি চিঞৰি জোকাই আছিলোঁ৷ ঠিক তেনেতে ৰাস্তাইদি গৈ থকা মানুহ এজন হঠাৎ হোষ্টেললৈ সোমাই আহিল৷ পিন্ধনত তেখেত খুব  পৰিপাটী আছিল; ফুল শ্লীভ চাৰ্ট, কাঢ়া ইস্ত্ৰী কৰা পেণ্ট, পলিচ কৰা জোতা, চকুত দামী চশমা, ডিঙিত টাই এডাল৷ হাতৰ ঘড়ীটো দেখিলেই দামী বুলি গম পোৱা গৈছিল, চুলিখিনি চাইডব্ৰাচ৷ আমি প্ৰথমে হোষ্টেলৰ কোনোবা ল'ৰাৰ অভিভাৱক বুলি ভাবি ছোৱালী জোকোৱা বন্ধ কৰিছিলোঁ কিন্তু ওচৰলৈ আহি যিডাল গোজৰণি মাৰিলে আমি থতমত খাই গ'লো৷ 'Eve teasing is an offence and punishable under অমুক তমুক বুলি এসোপামান কিবাকিবি কৈ কৈ হাতৰ টিপতে চাৰ্টৰ জেপৰপৰা অশোক চক্ৰ সম্বলিত আই-কাৰ্ড এখন দেখুৱাই নিজকে Intelligence Bureu, Northeastern Regional Deputy Head বুলি আমাৰ আগত কোৱাৰ লগে লগে আমাৰ বুকু কেইখন চিৰিঙকে মাৰিলে৷ আমাক আত্মপক্ষ সমৰ্থন কৰিবলৈ কথা কোৱাৰ সুযোগ নিদি তেখেতে ম'বাইল এটা উলিয়াই মুখ মেলি আআআ কে চাই থকা আমাৰ কেইটাৰ ফটো এখন খিচিককে মাৰি কাৰোবালৈ ফোন লগাই ক'বলৈ আৰম্ভ কৰিলে, "Yes I caught some of them red handed...I got some proof too, yes yes they were teasing the girls, send the van quickly......৷" 

আমাৰ সেই সময়ত বিহু ফাটি গৈছিল, IB অফিচাৰে ছোৱালী জোকাই থাকোঁতে ধৰিছে, ধেমালি কথা নেকি!

আমি ভঙা ভঙা মাতেৰে তেখেতক বুজাইছোঁ হে বুজাইছোঁ 'গুৱাহাটী ইউনিভাৰ্চিটী ম্যে য়্যে এক পৰম্পৰা হ্যে লড়কী জোকানেকা……লড়কী ভ্যী লড়কা কৌ অকলে মিলনে চে জোকাতা হ্যে আৰু লড়কা লৌগ ভ্যী জোকাতা হ্যে৷'

কিন্তু যিমানেই বুজাওঁ তেখেতে সিমানেই আইন, অপৰাধৰ কথা ক'বলৈ যায়৷ শেষত যেনিবা কিবা এটা বুজি পাইছিল তেখেতে; নেক্সট টাইম তেনেকুৱা নকৰিবলৈ কৈ চাহ খাবলে আমাৰপৰা দুশ টকা এটা লৈ তেওঁ ৰাস্তালৈ বুলি খোজ দিলে৷ আমিও স্বস্তিৰ  নিশ্বাস এৰিলোঁ, যি কি নহওঁক দুশ টকাতে কেচ চেটেপ লাগিল৷

     কিন্তু হঠাৎ, আমাৰ মনত সন্দেহ হ'ল৷ চাল্লা IBৰ অফিচাৰে ছোৱালী জোকোৱা কেচ চাবলৈ কিয় আহিব হে৷ অলপ চেতনা জাগিল আমাৰ মনত৷ মানুহজন তেতিয়া প্ৰায় দুশ মিটাৰমান গৈছিলহে হোষ্টেলৰপৰা ওলায়৷ আমি কেইটাই তেখেতৰ পাছ ল'বলৈ দৌৰ দিলোঁ৷ হঠাৎ মানুহটোৱে পাছলৈ এবাৰ চাই প্ৰথমে খৰখোজ, তাৰপাছত চুপাৰ স্পীডত দৌৰ দিবলৈ আৰম্ভ কৰিলে৷ ৰেচ এখন আৰম্ভ হ'ল; আগফালৰপৰা আহি থকা কোনোবা দুটামানে আমাৰ 'ধৰ ঐ তাক ধৰ' বুলি কোৱা চিঞৰ শুনি আগভেটি ধৰাত সি এইবাৰ দৌৰ দিলে পুৰণা আৰ্টচ বিল্ডিঙৰ মাজেৰে৷ পাছে পাছে আমাৰ দৌৰ চলি থাকিল৷ কি কৰোঁ কি নকৰোঁকৈ এইবাৰ সি 'বিশ পইছা' (গুৱাহাটী বিশ্ববিদ্যালয়ৰ পুৰণা আৰ্টচ বিল্ডিংৰ এটুকুৰা জনপ্ৰিয় ঠাই) ৰ ওচৰ পাই পুনৰ বাওঁহাতেৰে দৌৰ দি আছুৰ অফিচৰ ওচৰ পালেগৈ৷ আমাৰ ল'ৰাবোৰো এটা এটাকৈ গোট খাইছিল৷ খেদনৰ কোবত এইবাৰ সি কোনোবা এটাৰ গাৰ ওপৰেৰে জাঁপ মাৰি গৈ বাস্কেটবল কৰ্টত পৰিলগৈ৷ তাতে কোনোবা এটাই গবা মাৰি তাক ধৰাত সি লৰচৰ কৰিব নোৱাৰি তাতেই লুটি খাই পৰিল৷ 

     জেৰা কৰিবৰ বাবে মানুহটোক ছাত্ৰ জিৰণি কোঠাত সোমোৱাই লোৱা হ'ল৷ প্ৰথমে সি IBৰ মানুহ বুলি লম্ফজম্ফ কৰি আছিল যদিও চৰ দুটামান খোৱাৰ পাছত IBৰপৰা Assam Policeৰ আণ্ডাৰগ্ৰাউণ্ড পুলিচলৈ নামিল৷ সেই সময়তে তাৰ পকেটৰপৰা কোনোবা এটাই চাৰিখনমান কিবাকিবি আই-কাৰ্ড খুচৰি পাইছিল৷ আৰু দুটা চৰ পৰাৰ পাছত সি ওলালগৈ CIDৰ ট্ৰেইনিঙ পিৰিয়ডত থকা মানুহ৷ আৰু অলপমান মৰমত কথা পতা পাছত সি ক'লেগৈ সি বোলে নিজকে অফিচাৰ এজনৰ ফিলটো ল'বলৈ বিচাৰিছিল৷ পুলিচ মাতি তাক গতাই দিয়া হৈছিল৷ পুলিচে কি অনুসন্ধান কৰিলে নাজানোঁ, গধূলিলৈ থানাৰপৰা আমালৈ ফোন আহিছিল৷ 

"বেটা IB অফিচাৰ কোনোবা ফাঁচীবজাৰৰ মাৰৱাৰী বেপাৰীৰ পাউডাৰ খোৱা পুতেক ওলাইছিল৷"