স্মাগলাৰৰ বিলৈ
সুবোধ পাঠক
মই গোসাইগাওঁ থানাত চাকৰি কৰা ছমাহমান হওতেই অ চি ছাৰৰ বদলি হ’ল আৰু এজন নতুন অ চি আহিল।অ চি জনৰ ঘৰ গুৱাহাটীত,বদলি হৈ আহিছে শিৱসাগৰৰ পৰা।লগতে তেওঁ লেন্দমাষ্টৰ গাড়ী এখনো লৈ আহিছে।
প্ৰথম কিছুদিন ছাৰে গাড়ীখন লৈ থানা এলেকাত খা-খবৰ লৈ ফুৰা গম পাইছিলো।প্ৰায়ে অকলেই ওলাই গৈছিল আৰু মানুহজনে এদাল গুৰিৰ ফালে পিতল লগোৱা দীঘল লাঠি লগত লৈ ফুৰিছিল।শুনামতে তেওঁক শিৱসাগৰত ৰাইজে কালাপাহাৰ বুলিছিল।ওখ পাখ অ চি ছাৰক আমিও ভয় কৰিছিলো, চকুলৈ চাবলৈ সাহস নহৈছিল।
এদিন আগবেলা ন মান বজাত অ চি ছাৰে কাৰোবাৰ লগত ফোনত কথা পাতি উঠি মোক কলে,
“ ব’লা মোৰ গাড়ীত উঠা”।
দুয়ো গাড়ীত উঠিলো আৰু ছাৰে গাড়ী চলাই হাইৱেৰে শ্ৰীৰামপুৰৰ ফালে যাব ধৰিলে।এবাৰ সাহস গোটাই কলৈ যাম বুলি সোধাত, এজন স্মাগলাৰ ধৰিব লাগে বুলি কৈ জোৰেৰে গাড়ী চলাই গৈ থাকিল।
শ্ৰীৰামপুৰত আমাৰ গাড়ী ধুবুৰীৰ ফালে ঘূৰোতেই আগত এখন ট্ৰাক দেখি ছাৰে কলে এই ট্ৰাক খন ধৰিব লাগে।আমি কিছু আগবাঢ়ি যাওতেই ৰেল গেট বন্ধ হ’ল কিন্তু ট্ৰাকখন পাৰ হৈ গ’ল।কম সময়তে এটা ৰেলৰ ইঞ্জিন পাৰ হৈ গ’ল আৰু ৰেলগেট খন খুলিলে।
এইবাৰ ছাৰে দুৰন্ত গতিত খেদি গৈ গৈ ট্ৰাকৰ ওচৰ পালে।ট্ৰাকৰ লোকেও এতিয়াহে বোধহয় গম পালে যে পুলিচে খেদিছে।দুৰন্ত গতিত আগে আগে ট্ৰাক পিছে পিছে আমি।হিন্দী চিনেমাৰ দৃশ্য যেন লগিছিল।
গ্ৰেভেল ৰাস্তা, ট্ৰাকৰ ধূলিৰ কাৰনে আগলৈ একো নেদেখি।একোবাৰ এনে লাগে যেন আমি ট্ৰাকখনত খুন্দা মাৰিম।ইয়াৰ আগতে কেতিয়াও ইমান বেগত ভয়াবহ ভাবে চলা গাড়ীত উঠা নাছিলো।
এনেদৰে কিছুদূৰ যোৱাৰ পিচত লক্ষ্য কৰিলো চলন্ত ট্ৰাকৰ ওপৰৰ পৰা দুজন লোকে চাউলৰ বস্তা ৰাস্তাত পেলাই গৈ আছে কিন্তু গাড়ীৰ গতি বেগৰ কাৰনে বস্তা বোৰ ৰাস্তাত পৰি নিমিষতে ফাটি নোহোৱা হৈ যায়।এটা বস্তা নাফাটিলেই আমি বস্তাত খুন্দিয়াই দুৰ্ঘটনাত পৰাটো নিশ্চিত ভাবি বৰ ভয় লাগিছিল।কিন্তু ছাৰক কিবা কবলৈও সাহস হোৱা নাছিল।
প্ৰায় ১০-১২ কিঃমিঃ এনেদৰে যোৱাৰ পিছত বস্তা পৰা বন্ধ হ’ল যদিও গাড়ীৰ ৰেচ চলি থাকিল।গ্ৰাহমপুৰ বাছস্টেণ্ডত ট্ৰাক খনে এজন চাওঁতাল লোকক খুন্দিয়াই আৰু জোৰেৰে পলাবলৈ ধৰিলে। লোকজনৰ ওপৰেৰে ট্ৰাকখন উঠি যোৱাত তেওঁৰ ঠিতাতে মৃত্যু হৈছিল।ক্ষন্তেক ৰৈ আমি পুনৰ ট্ৰাকৰ পিছ ললো।
দিংদিঙা বজাৰ পোৱাত, গতি বিষম দেখি, ট্ৰাকখন অন্য ৰাস্তাৰে পুনৰ গোসাইগওঁৰ ফালে ঘূৰাই অলপ দূৰ গৈ দিংদিঙা মিছন হাস্পাতালৰ ওচৰতে থকা বোস বাবু(অৱসৰ প্ৰাপ্ত পুলিচ বিষয়া)ৰ চৌহদত ৰখায় আৰু চালকৰ আসনৰ পৰা গোসইগাওঁৰ সাহা বোলা ব্যাৱসায়ীজন নামি দৌৰি তাঁৰৰ বেৰ পাৰ হৈ চাহ বাগানত সোমাল।লগত অহা অন্য দুজনো বাগানত সোমাল। সাহাৰ ধূতিৰ এটা অংশ তাঁৰ কাঁইটৰ বেৰত লাগি থাকিল।
আমিও পিছে পিছে গৈ বোস বাবুৰ ঘৰ পালো।বোস বাবুৰ দুমহলীয়া টিনৰ ঘৰ।চোতালত গাড়ী মানুহৰ শব্দ শুনি তেওঁ ঘৰৰ পৰা ওলাই আহি আমাক দেখি ভিতৰলৈ মাতি নি বহিবলৈ দিলে।অ চি ছাৰে ঘটনাৰ বিষয়ে বোস বাবুক বিবৰি কলে আৰু গ্ৰাহমপুৰত ট্ৰাকখনে মানুহ মৰা কথাও কলে।আমি কথা পাতি থাকোতে সাহাই পিছফালেদি আহি আমাৰ ওচৰ পালে আৰু ছাৰৰ ভৰিত ধৰি তেওঁক বচাবলৈ কাকুতি কৰিলে।সাহা কেইবাখনো বাছ,ট্ৰাকৰ মালিক । যেনে-তেনে বচাবলৈ ছাৰক কৈ থাকোতই বাটত মানুহৰ হাল্লা শুনা গ’ল।
দেখা গ’ল গ্ৰাহমপুৰৰ পৰা এদল চাওঁতাল লোকে হাতত ধনু কাড়,লাঠি লৈ গাড়ী-দ্ৰাইভাৰ বিচাৰি বোস বাবুৰ ঘৰ পাইছে।বোস বাবুই ক'লে ইয়াক নিশ্চয় আজি মাৰি পেলাব।লগে লগে তেওঁ সাহাক ওপৰ তলাৰ এটা ৰুমলৈ নি তাত থকা এটা কাঠৰ আলমাৰীৰ কাঠৰ দৰজা থকা তলৰ অংশত আঠুকঢ়াই সোমোৱাই বাহিৰৰ পৰা তলামাৰি দিলে।ওপৰৰ অংশত আইনাৰ দৰজা আছিল।
আমি বাহিৰলৈ ওলাই আহি দেখিলো চাওঁতাল লোকবোৰে বোসবাবুৰ ঘৰ চাৰিও ফালৰপৰা ঘেৰি ধৰিছে।তেওঁলোকক দ্ৰাইভাৰজন লাগে। দ্ৰাইভাৰজন তেওঁৰ ঘৰত সোমোৱা নাই, বেৰ পাৰ হৈ বাগানত সোমাইছে আৰু,তাৰ ধুটিৰ কাপোৰ এতিয়াও তাঁৰৰ বেৰত লাগি থকা বুলি বোসবাবুৱে কোৱাতো সিহতে বিশ্বাস নকৰি ঘৰৰ ভিতৰত চাবলৈ চিঞৰ-বাখৰ কৰিবলৈ ধৰিলে।
এনেতে স্থানীয় বিধায়ক ডাঙৰীয়াও আহি ওলাল। আমি বিধায়ক ডাঙৰীয়াক লগত ৰাইজৰ এজন লৈ ঘৰৰ ভিতৰত চাবলৈ ক'লো।বিধায়ক জনে লগত ৰাইজৰ এজন ললে আৰু আমিও লগত গলো।ভিতৰত কোনো মানুহ নাপাই বিধায়কে ৰাইজক জনোৱাত এইবাৰ সিহত দ্ৰাইভাৰ বিছাৰি বাগানত সোমাল।অ চি ছাৰে কোৱামতে বিধায়কক সাক্ষী কৰি ট্ৰাকখন জব্দ কৰিলো।ঘটনাৰ বিষয়ে আলোচনা কৰি বিধায়ক ডাঙৰীয়া ঘৰলৈ (গ্ৰাহমপুৰ)গ’ল আৰু আমিও অলপ স্বস্তিৰ নিশ্বাস পেলালো।
এতিয়া সমস্যা হ’ল আলমাৰীত বন্ধ সাহাক থানালৈ নিয়া যায় কেনেকৈ?
ছাৰে বুধি এটা উলিয়াই ওচৰৰ তামাৰহাট চকীৰ পৰা খবৰ পঠাই থানাৰ পৰা সাহাৰ বাছ এখনতে কিছু চিপাহী,এজন দ্ৰাইভাৰ আৰু এযোৰ চিপাহীৰ সাজ পঠাবলৈ ক'লে।ইতিমধ্যে আমি ওপৰৰ ৰুমৰ আলমাৰীটো খুলি সাহাক উলিয়াই দিলো।সি ভয়ত বিতত আৰু কঁপি আছিল।
কিছু সময়ৰ পিছত কিছু চিপাহীসহ বাছ আহিল।চিপাহী সকলক ঘৰত সোমাই দি সাহাক পুলিচৰ সাজ পিন্ধাই সিহতৰ মাজতে লৈ বাছখনেৰে থানালৈ পঠোৱা হল।মই জব্দ কৰা ট্ৰাকখন লৈ থানালৈ গলো।
থানাত এটা গোচৰ ৰুজু কৰি সাহাক গ্ৰেপ্তাৰ কৰি পিচদিনা আদালতলৈ পঠোৱা হ’ল।
অ চি ছাৰে কোৱা মতে সাহাই হেনো এদিন দম্ভ মাৰি কৈছিল যে তেওঁ স্মাগলিং নকৰে। কোনোবাই তেওঁক প্ৰমান কৰিব পাৰিলে তেওঁৰ নামত ঘৰ মাটি লিখি দিব।সাহাই সেইদিনা নিশ্চিত মৃত্যুৰ পৰা হাত সাৰিল যদিও দৰ্প কিন্তু চূৰ্ন হ’ল।
~*~
No comments:
Post a Comment